Kawat

Adtong niaging Sabado, human sa misa sa among gamay nga chapel, niduol na pod akong Papa (ex-president sa homeowners' association) sa rostrum - nagpasalamat sa pari nga nagmisa ug sa pipila ka mga silingan isip mass sponsors. Ang updates niya - "naghire" sila ug laing tao (actually, silingan ra pod) nga motabang sa ilang peace and order committee. Nganong "naghire" man? Kay lately, diha'y duha ka mga balay nga gipangkawatan ug mga bug-at nga butang. Unsa man pod ka bug-ata? No. 1: Mga baga nga kabilya. No. 2: Daan ug guba nga gate. Ahhh. "So unsa ma'y atong buhaton?" pangutana sa akong Papa. "Akong suggestion, kining mga butanga aron dili makawat, kung mahimo, atong isulod sa atong mga panimalay!" Uhm, Pa excuse me! Di ba kanang gate para ra man na sa gawas sa balay? (pero sa ako ra ning huna-huna) ug kanang kabilya, di ba para ra pod na sa haligi sa balay? (sa ako ra gihapong huna-huna). Ug naa pa gyu'y lain. Iyang gi-awhag ang mga kasilinganan nga ug simbako makakita ug makadudahan nga mga tao sa among palibot, pahibaw-on dayon ang peace and order committee aron ilang pangitaon kining mga tawhana (kung tao man gyud gani). Pero dili sila modakop kay wala man sila'y authority ug capacity para modakop. Igo ra nilang pangitaon ug timan-an ang mga nawng nga makadudahan aron ila po'ng isumbong sa barangay chairman. Kining tanan nga mga suggestions, gisulti ni sa akong Papa (nga ex-president) sa atubangan sa dul-an 50 ka mga nanimbahay, gamit ang microphone. Ug pila'y pad nga katong mga makadudahan ug nawng, nakapaminaw pod sa maong suggestions. Hinaot pa nga wala lang unta sila kasabot sa mga nahisgutang plano. Ug hinaot pod nga dili moabot sa higayon nga ang tibuok balay na ang sunod alsahon ug kawaton! Nang karon, mabalik ta sa akong huna-huna, ingon ko ug "Kana Pa kana, kanaog na diha!" Please.